Pasahat Batu ni Sulang

ANGKA PANGKATAION 

DI NA PASAHAT BATU NI SULANG

PARANAK

Gabe ma tutu jala horas rajanami, ia taringot di sipanganon :  Godang ninna sibutong-butong, otil sipir ni tondi, sai pamurnas mai tu pamatang muna saudara tu bohi, sipasindak panaili mai sipaneang holi-holi.    

    Asa bagot na marhalto ma ninna rajanami niagatan di robean, horas ma hamu manganton sai martamba-tamba ma antong di hami na mangalean

Raja nami, ia hata ni sipanganon i dohonon nami ma : Sititi ma sitompa, golang-golang pangarahutna, tung so sadia pe  nuaeng sipanganon na hupatupa hami sai   tu godangna ma  pinasuna. Sai mamasu-masu ma antong Amanta Debata raja  nami, marhite-hite tangiang mu tu hami pamoruan muna. Sai   lam martamba-tamba ma antong di hami sinadongan tu joloan  ni arion, asa boi dope nian patupaon  nami sipanganon na tabo  tu ari na naeng ro dope laho pasangaphon hamu.  Jadi ianggo  taringot di hata ni sipanganon na sinungkun muna raja nami,   Panggabean Parhorasan do nidokna, botima raja nami.

    .....

Gabe ma tutu jala horas rajanami, toho do nanidok ni rajai, sai marangkup ma nauli, sai mardongan do na denggan. Nuaeng  pe tutu raja nami paboaon ma tutu iangkupna songon na  hundul, sidonganna songon na mardalan.     

    Parjolo : mauliate ma dohonon nami tu hamu saluhut hula-hula  nami na ria  manjangkon hami di bagasta na marampang  marjual on. Bagas sibaganding tua panjaloan ni sangap dohot tua, ia taringot di haroro nami raja nami na adong do na solot di ate-ate nami, jala magompong di pusu-pusu nami, manang si sombahonon nami tu hamu raja nami.

Alai raja nami molo tung adong annon di hata nami na hurang  lobi maradophon hamu marpanganju ma hamu raja nami di hami.

 Ai ampapaga dolok do tu ampapaga Humbang, hita do sogot laos hita do haduan. Jadi ianggo taringot tu haroron   nami raja nami songonon ma : Ia na saleleng on        raja nami, nungga pajolo gogo papudi uhum hamu raja nami,  alani........................ on ala nungga marhosohotan dohot  boru ni rajai (ima boru sian bagas on).

    Raja nami, siala ni ma apala haroro nami apala di tingkion na mandapothon    hamu raja nami, naeng manggarar huhut manjalo adat nagok ma hami nian raja nami di tangiang dohot pasu-pasu munai, asa anggiat ma sahat angka nauli nadenggan  dohot panggabean parhorasan tu helamu dohot borumu suang songoni ma tu beremu dohot pahompu muna raja nami.

    

    Botima raja nami.

 

Sumber : Ama Erison Tanjung